श्रावण ३२/धनगढी
नेपाल कम्युनिष्ट पार्टी सुदूरपश्चिम प्रदेश समितिले देशभक्त, कम्युनिष्ट, समाजवादी र लोकतान्त्रिक गणतन्त्रवादी शक्तिसँग ध्रुवीकरण र एकतामा जोड दिने निर्णय गरेको छ ।पार्टीको केन्द्रीय नीतिअनुरूप चार मित्रशक्ति, चार मित्रवर्गका रूपमा किसान, मजदुर, मध्यम वर्ग र राष्ट्रिय पुँजीपति वर्ग र छ मित्र समुदायका रूपमा खसआर्य, जनजाति,मुस्लिम, मधेशी,महिला र श्रमिक (दलित ) वर्गबाट ध्रुवीकरणमा जोड दिने निर्णय गरेको हो ।
प्रदेश सचिवालयको बैठकले नेपाली विशेषताको समाजवाद र एकीकृत जनक्रान्तिबारे स्पष्ट पार्न आन्तरिक स्कुलिङ, प्रशिक्षण र बाह्यरूपमा भेटघाट तथा अन्तरक्रिया गर्ने, पार्टी प्रदेश कार्यालयका तर्फबाट सरकारी कार्यालय समन्वय विभाग गठन गरी जनताको काममा सहजिकरण गर्ने निर्णय गरेको प्रदेश इन्चार्ज भरत सीद्वारा जारी प्रेस विज्ञप्तिमा उल्लेख गरिएको छ।
एमसीसी र त्यसका नाममा बढेको अमेरिकी हस्तक्षेपको भण्डाफोर गर्ने, शिक्षा, स्वास्थ्य र विकास,अनुदानका योजनामा भएका विकृत्ति र भ्रष्टाचारविरूद्ध संघर्ष गर्ने, सुदुरपश्चिम प्रदेशमा भएको बजेटशुन्यताको अन्त्य गर्न ध्यानाकर्षण गराउने, पार्टीको उत्पादनको योजनाका कार्यले राम्रो प्रभाव पारेको र त्यसलाई प्रभावकारी ,प्रविधिमैत्री र विस्तार गर्ने निर्णय समेत गरेको विज्ञप्तीमा उल्लेख गरिएको छ।