पञ्चकोशी संवाददाता । दैलेख जिल्लाको आठबीस गाउँपालिका–१ लयाटा डाँडास्थित मध्यपहाडी लोकमार्गको छेउमा रहेको एक घरमा टिप्पर ठोक्किँदा पाँच जना गम्भीर घाइते भएका छन्।
शनिबार बिहान करिब ७:३० बजे पश्चिमबाट आउँदै गरेको बा २ क ९३६९ नम्बरको टिप्पर अनियन्त्रित भई सडक छेउको घरमा ठोक्किएको थियो। उक्त घरमा बसोबास गर्दै आएका बाले बिक, उनकी श्रीमती मनसरा बिक, छोरा रोसन बिक, नवीन बिक र जंगे कामी गम्भीर घाइते भएका हुन्।
स्थानीयका अनुसार घटना हुँदा पीडितहरू सबैजना घरमै थिए। टिप्परको ठक्करले घर पूर्ण रूपमा क्षतिग्रस्त भएको छ भने घरभित्र रहेका सम्पूर्ण सामग्रीसमेत नष्ट भएका छन्।
घाइतेहरूको तत्काल उद्धार गरी उपचारका लागि प्रदेश अस्पताल सुर्खेत लगिएको छ। यतिबेला उनीहरूको अवस्था गम्भीर रहेको जनाइएको छ।
घटनाबारे थप अनुसन्धान भइरहेको जिल्ला प्रहरी कार्यालय दैलेखले जनाएको छ।