भाद्र १/धनगढी

सुदूरपश्चिममा आज ओल्के पर्व मनाइदैछ। केरा,काँक्रा, चिचिण्डा, दही, पिँडालुका पात र हरियो सागपात आफन्तजन तथा अग्रजलाई बाँडेर सुदुरपश्चिममा ओल्के पर्व उल्लासपूर्वक मनाउने गरिन्छ।

साउन महिना सकिनलाग्दा सुदुरपश्चिममा ओल्के पर्वको रमझम सुरु हुन्छ। साउने झरी सकिएलगत्तै झरी, बाढीपहिरो र प्राकृतिक प्रकोपबाट बाँचेको खुशियालीमा सुदुरका पहाडि जिल्लामा ओल्के पर्व मनाउने चलन छ। साउनको अन्तिम दिन र भदौको पहिलो दिनमा विशेष महत्वका साथ ओल्के पर्व मनाउने परम्परा रहिआएको छ।

ओल्को भन्नाले ’उपहार’ वा ’कोसेली’ भन्ने बुझिन्छ। आफूभन्दा ठूलाबडा मान्यजन वा ज्येष्ठ नागरिकलाई सम्मानस्वरुप कर्कलाको भित्री पात, फलफूल आदि दिनु, मिठो -मसिनो खाएर रमाइलो गर्नु यस पर्वको विशेषता हो।